वाशिङ्टन । अमेरिकी राष्ट्रपति डोनाल्ड ट्रम्पपुत्री टिफनी ट्रम्पले जर्ज फ्लोइड विरोध प्रदर्शनको समर्थन गरेकी छन् ।
गत साता एक गोरा प्रहरीले अश्वेत नागरिक जर्न फ्लोइडलाई घुँडाले घाँटीमा टेकर पक्राउ गरेको प्रहरी हिरासतमै उनको मृत्यु भएपछि अमेरिकाभर हिंसात्मक विरोध प्रदर्शनहरु भइरहेका छन् ।
विरोध प्रदर्शनलाई रोक्न अमेरिकाका विभिन्न ४० सहरमा कर्फ्यु जारी गरिएको छ । कर्फ्युका बाबजुद पनि अमेरिकनहरु आन्दोलनमा सहभागी भइरहेका छन् ।
राष्ट्रपति ट्रम्पले आन्दोलनलाई दबाउने प्रयास गरिरहेका छन् ।
टिफनी ट्रम्पले इन्स्टाग्राममा एक कालो तस्बिर पोस्ट गर्दै #BlackOutTuesday #justiceforgeorefloyd ह्यासट्यागसहित शेयर गरेकी छन् ।
उनले लेखेकी छन्, “एक्लै हामीलाई केही प्राप्त गर्न समस्या हुन्छ अथवा कम प्राप्त गर्छौं र एकसाथ लड्यौं भने धेरै प्राप्त गर्न सकिन्छ ।”
राष्ट्रपति ट्रम्पकी पुत्री टिफनी एक वकिल हुन् । ह्वाइट हाउस बाहिर भइरहेको प्रदर्शनलाई नियन्त्रणमा लिनका लागि प्रहरीले अश्रु ग्यास प्रहार गरिरहेको बेला टिफनीले यस्तो प्रदर्शन गरेका हुन् ।
राष्ट्रपति ट्रम्पकी दोस्रो पत्नी अर्थात् टिफनीकी आमा मार्ला मैपल्सले पनि प्रदर्शनकारीलाई समर्थन गरेकी छन् । – बीबीसी
