हुम्ला : हुम्लाको तल्लो क्षेत्रमा रहेको अदानचुली गाउँपालिकामा पाँच दिनदेखि बिजुली नभएको कारण त्यहाका बासिन्दाहरु अन्धकारमा बस्दै आएका छन्।
कुकुरफाल्ना जलविद्युत्को नहर भत्केर विद्युत् आपूर्ति हुन नसक्दा यहाँका नागरिक यही फागुन २० गतेदेखि अँध्यारोमा बस्दै आएका छन्।
विद्युत् कार्यालयका सहयोगी हरीकृष्ण जैसीका अनुसार रुख ढलेर जलविद्युत्को नहर भत्किँदा मर्मत गर्न समय लाग्ने भएकाले गाउँपालिकाका नागरिक अन्धकारमा बस्दै आएका छन्। क्षतिबाट अवरुद्ध भएको नहर मर्मतका लागि फागुन २२ गतेदेखि २० स्थानीयवासीलाई काममा खटाइएको जैसीले बताए।
एक हप्ताभित्र विद्युत् सेवा आपुर्ति गर्नका लागि नहर मर्मतमा यहाँका स्थानीयवासी लागी परेका छन्। रुख ढलेर करिब १० मिटर नहर भत्किएको छ। तीस किलोवाट क्षमता रहेको विद्युत् प्रसारणको नहरमा ठूलो पानी आएका कारण रुख ढलेर क्षति भएको हो। विद्युत अवरुद्ध हुँदा वडा तीनको गोरापाली र ढकानीकुनाका नागरिक सहित वडा नं ४, ५ र ६ का पूरै बस्ती अन्धकार भएको छ।
विद्युत प्रसारण लाइनमा भने कुनै समस्या नभएको बताइएको छ । रासस
