चितवन । चितवनमा थप ८ जनामा कोरोना भाइरस संक्रमण पुष्टि भएको छ ।
भरतपुर कोभिड १९ परीक्षण प्रयोगशालामा शनिबार गरिएको परीक्षणको नतिजामा दुईजना प्रहरी, एक थुनुवा र एकजना बालकसहित ८ जनामा कोरोना संक्रमण भएको पुष्टि गरिएको हो ।
स्वास्थ्य कार्यालय, चितवनका प्रमुख दीपक तिवारीका अनुसार दुईजना नेपाल प्रहरी, एक सशस्त्र प्रहरी, एकजना जिल्ला प्रहरी कार्यालयमा रहेका थुनुवा, एक ६ वर्षीय बालक, एकजना भरतपुर अस्पतालमा बहिरगं विभागमा उपचार गर्न आएका बिरामी, एकजना चितवन मेडिकल कलेजमा उपचारार्थ बिरामी र अर्का एकजना गैंडाकोटको होम क्वारेन्टिनमा रहेका व्यक्ति छन् ।
कोरोना पुष्टि भएकामध्ये ६ जना चितवनका हुन् भने २ जिल्ला बाहिरका रहेको तिवारीले जानकारी दिए ।
तीमध्ये शुक्रबार एकै परिवारका तीनजनामा कोरोना पुष्टि भएका परिवारका सदस्यका बालक रहेका छन् ।
शनिबार ६९ जनाको स्वाब परीक्षण नतिजामा थप ८ जनामा कोरोना देखिएको हो ।
