लेखक – सोमनाथ दाहाल
कस्तो भ्रष्ट हुने भनौँ न महिमा यो काल विश्राममा
राती चार गुणा दुई दिन गरी त्यो भ्रष्ट यो बिचमा ।
चिच्याए सब लौ मिलेर जनता जान्दैन लौ यो पिर
खाए देश सबै भएर दिनमा को चोर हो आखिर? ।।
१
भन्ने गर्दछ माझ आज जनता नेता महा चोर हो
नेता भन्दछ कामदार सबमा पूरा सबै चोर हो ।
भो काङ्ग्रेस र कम्युनिष्ट उनमा यो दोष कालो भिर
खाए देश सबै भएर दिनमा को चोर हो आखिर ?।।
२
न्यायाधीश भनाभनी हुन गयो त्यो चोर हो सांसद
हो यो चोर सबै भनी पुलिसमा खै छैन है फुर्सद ।
लागे है प्रहरी नि सर्व जनता ती चोर भन्ने तिर
खाए देश सबै भएर दिनमा को चोर हो आखिर? ।।
३
बूढो भन्छ युवा सबै फगतमा बाचेछ संसारमा
लोभी वृद्ध भनेर नाम उनको राख्ने भए चोरमा ।
भन्ने मूर्ख जमात चोर अहिले विद्वानको मन्दिर
खाए देश सबै भएर दिनमा को चोर हो आखिर? ।।
४
चोर्ने जीवन गाउँले सहरका भन्दैछ जो सेठले
भन्ने यो मुखिया धनाढ्य जनमा गन्दैछ यो चोरले ।
मान्छे दुर्गुण चर्च मस्जिद हुँदै गुम्बा र ती मन्दिर
खाए देश सबै भएर दिनमा को चोर हो आखिर? ।।
५
