एजेन्सी । कोरोना भाइरसको अनुसन्धान गरिरहेका चिनियाँ शोधकर्ताको अमेरिकामामा मृत्यु भएपछि विश्वभरि ‘षड्यन्त्रको कथा’ बुनिएको छ ।
३७ वर्षीय बिङ ली शनिबार आप्mनै घरमा मृत भेटिएका थिए । उनी युनिभर्सिटी अफ पिट्सबर्गको स्कुल अफ मेडिसिन विभागमा असिस्टेन्ट प्रोफेसर थिए ।
लिका साथ काम गर्दै आएका व्यक्तिहरूले उनी कोभिड–१९ बारे ‘अहम् खोज’ गरेर नजिकै पुगिसकेको दाबी गरेका छन् । त्यसपछि अनलाइन मिडियामा उनको हत्या भएको समाचारहरू प्रकाशित भए । प्रहरीले घटनामा दुईजनाको मृत्यु भएको जनाएको छ । प्रहरीको दाबीअनुसार एकजनाको हत्या भएको हो भने अर्का एकजनाले आत्महत्या गरेका हुन् ।
स्थानीय प्रहरीका अनुसार पिट्सबर्गमा बिङ लीको टाउको, शरीर, हातखुट्टा र गर्दनमा गोली लागेको थियो ।
गोली प्रहार गर्ने व्यक्तिको पहिचान ४६ वर्षीय सफ्टवेयर इन्जिनियर हाउ ग्यु का रूपमा भएको बीबीसीले जनाएको छ ।
सुरक्षा अधिकारीहरूले कारबाट फर्किंदै गर्दा ती व्यक्तिले आत्महत्या गरेको बताएका छन् । बिङ ली र हाउ ग्यु एक–अर्कासँग परिचित थिए ।
अनुसन्धानका क्रममा घटना हत्यापछि आत्महत्या भएको बताइन्छ । घटनाअघि ‘दुवैबीच अन्तरंग साथीबारे लामो बहस’ भएको बीबीसीमा उल्लेख छ ।
जाँचकर्ताहरूले मैजुदा कोरोनाको शोधलाई लिएर लीको हत्या भएको बारेमा कुनै प्रमाण नभएको बताएका छन् ।
चिनियाँ नागरिक लीले सिंगापुरबाट स्नातक र पीएचडी गरेका थिए । त्यसपछि उनी शोधका लागि अमेरिका पुगेका थिए ।
के हो षड्यन्त्रको कथा
चिनियाँ सोसल प्लेटफर्म विबोमा एक प्रयोगकर्ताले लेखेका छन्, “ओ माई गड, यस्तो लाग्दै छ जस्तो यो मिसन इम्पोसिबलको कथा हो ।
सायद उनी भाइरस अमेरिकाको ल्याबमा तयार भएको नतिजासम्म पुगिसकेका थिए ।”
चिनियाँ अधिकारीहरू र सरकारी मिडियाले अमेरिकाको ल्याबमा भाइरस तयार पारेर अमेरिकी सेनाको सहयोगमा वुहान पुर्याइएको आधारहीन दाबी केही दिनअघि मात्रै गरेका थिए ।
केही विबो प्रयोकर्ताहरूले भनेका छन्, “यो संयोगको कुरा लाग्दैन ।” एकले लेखेका छन्, “यो एक अत्यन्तै असामान्य मामिला हो । कैयौं रहस्य यसमा लुकेका छन् ।”
ली चिनियाँ नागरिक हुनु नै उनलाई अमेरिकाले जोखिममा पारेको केही प्रयोगकर्ताको दाबी छ । यद्यपि, चिनियाँ भएकै कारण उनलाई निशाना बनाइएको दाबीमा कुनै प्रमाण फेला परेको छैन ।
चीनको सरकारी मिडियासँग सम्बन्धित एक वेबसाइट ‘ग्लोबल टाइम्स’ ले एक लेख प्रकाशित गरेको छ, जसमा लीको मृत्युसँग जोडिएका कैयौं अड्कल लगाइएको छ । ट्विटरमा कैयौं मानिसहरूले घटनामा चीनको भूमिका हुन सक्नेसमेत दाबी गरेका छन् । –बीबीसी
