काठमाडौं । कञ्चनपुरमा एकैदिन २६ जना नयाँ कोरोना संक्रमित थपिएका छन् ।
धनगढीस्थित सेती प्रादेशिक अस्पतालको प्रयोगशालामा पछिल्लो चौबीस घण्टामा कञ्चनपुरका २१ पुरुष र ५ महिला गरी २६ जनामा संक्रमण पुष्टि भएको हो ।
सेती प्रादेशिक अस्पताले जारी गरेको विज्ञप्तिमा बेलौरीका पाँचजना, बेल्डाडीका आठजना र शुक्लाफाँटाका १३ गरी २६ जनामा कोरोना पुष्टि भएको छ ।
पछिल्लो चौबीस घण्टामा यो प्रयोगशालामा २८५ जनाको कोरोना जाँच गरिएको समेत विज्ञप्तिमा उल्लेख छ ।
यसअघि हिजो साँझसम्म कञ्चनपुरमा ४८६ जना संक्रमित थिए । २६ जना थपिएसँगै संक्रमितको संख्या ५१२ पुगेको छ ।
