एजेन्सी । स्पेनिस ला लिगा फुटबलअन्तर्गत आज (शुक्रबार) राति विभिन्न तीन खेल हुँदै छन् ।
आज हुने खेलमा शीर्ष स्थानको बार्सिलोनाले तेस्रो स्थानको सेभियासँग प्रतिस्पर्धा गर्दै छ । सेभियाको घरेलु मैदानमा हुने खेल नेपाली समयअनुसार राति १ः४५ मा सुरु हुनेछ ।
आजको खेलमा बार्सिलोनालाई जित्नैपर्ने दबाब छ । आजको खेलमा जित निकाले बार्सिलोनालाई शीर्ष स्थानमा पाँच अंकको अग्रता मिल्नेछ ।
२९ खेल खेलेको बार्सिलोना ६४ अंकसहित तालिकाको शीर्ष स्थानमा छ । समान खेल खेलेको रियल ६२ अंकसहित तालिकाको दोस्रो स्थानमा छ ।
सेभिया पनि आजको खेलमा बार्सिलोनालाई हराउँदै आफूलाई लिगमा बलियो बनाउने योजनामा छ । २९ खेल खेलेको सेभियाको ५१ अंक छ ।
आजै हुने अर्काे खेलमा मालोर्काले लेगानेससँग प्रतिस्पर्धा गर्दै छ । दुई टोलीबीचको खेल राति ११ः४५ मा सुरु हुनेछ । सोही समयमा ग्रानाडाले भिल्ला रियलसँग प्रतिस्पर्धा गर्दै छ ।
