बर्दिया : नेपालगन्जबाट सुर्खेतको विरेन्द्रनगरतर्फ जाँदै गरेको कार सोमबार दिउँसो अनियन्त्रित भइ दुर्घटना हुँदा पूर्वजलस्रोत राज्यमन्त्री विनोदकुमार शाहसहित पाँच जना घाइते भएका छन्। बा २१ च ४७४६ नम्बरको कार बर्दिया बासगढी नगरपालिका -१ चेपाङको २९ खोला नजिक पल्टिएको प्रहरीले जनाएको छ।
प्रहरी उपरीक्षक केदार रोजौरेका अनुसार कार पल्टिँदा पूर्वराज्यमन्त्री विनोदकुमार शाह, लक्ष्मी शाह, पदमबहादुर शाही, सूर्यबहादुर शाही र कार चालक विनय भण्डारी घाइते भएका छन्।
पूर्वराज्यमन्त्री शाहको अवस्था गम्भिर रहेको छ। घाइतेमध्ये अन्य चार जनाको अवस्था सामान्य रहेको प्रहरी उपरीक्षक रोजौरेले जनाए। चालक भण्डारीको कोहलपुरस्थित शिक्षण अस्पताल र ४ जनाको नेपालगन्जस्थित शिक्षण अस्पतालमा उपचार भइरहेको प्रहरीले जनाएको छ।
कार सडकदेखि करिब ६० मिटर तल खसेको थियो। उक्त घटना सदरमुकाम गुलरियादेखि करिब ६० किमी पूर्व उत्तर रत्न राजमार्गमा भएको हो।
